Улаанбаатар хотын Ногоон орон сууц төсөл хэрэгжих бүсэд үйл ажиллагаа явуулдаг өрхийн болон жижиг дунд үйлдвэрлэл (ЖДҮ) эрхлэгчид Жижиг, дунд үйлдвэрийг хөгжүүлэх сангаас (ЖДҮХС) олгох зээлийн мэдээллийг хүртээмжтэй хүлээн авах, зээлд хамрагдах хүсэлтийг илэрхийлсэн.
Уг хүсэлтийн дагуу төсөл хэрэгжүүлэх нэгж нь “Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төсөлтэй хамтран 2024 оны 1 дүгээр сарын 26-ний өдөр Баянхошуу Бизнес инкубатор төвд ЖДҮ эрхлэгчдэд зориулан “Мэдээллийн цаг”-ийг зохион байгууллаа.
Уулзалтад Засгийн газрын хэрэгжүүлэгч агентлаг Жижиг, дунд үйлдвэрийн газрын төлөөлөл хүрэлцэн ирж, 2024 онд ЖДҮХС-аас хөнгөлөлттэй зээл олгох салбар, чиглэл, шалгуур үзүүлэлт, бүрдүүлэх материалыг танилцуулан, төслийн материал хүлээн авах цахим системийг ашиглах заавар зөвлөмжийг хүргүүлсэн. Мөн уулзалтад төсөл хэрэгжих талбар болон ойр орчмын бүсийн нийт 11 ЖДҮ эрхлэгчид хамрагдан оролцлоо.
ЖДҮХС-аас олгох зээлийн төслийн материалыг 2024 оны 1 дүгээр сарын 24-ний өдрөөс эхлэн 2 дугаар сарын 23-ний өдөр хүртэл цахимаар хүлээн авна. Та доорх холбоосоор нэвтрэн, дэлгэрэнгүй мэдээллийг хүлээн авна уу.