Нийслэлийн Засаг даргын Тамгын газар, Азийн Хөгжлийн банк болон Уур амьсгалын Ногоон сантай хамтран хэрэгжүүлж буй “Улаанбаатар хотын ногоон орон сууц төсөл”-ийн эко хорооллын барилга угсралтын явц, газрыг орон сууцаар солих үйл ажиллагааг танилцуулах уулзалтыг Шархад дэд төв, Баянзүрх дүүргийн 19-р хорооны иргэдэд зориулан 2024 оны 3 дугаар сарын 23-ний өдөр зохион байгууллаа.
Уулзалтад Нийслэлийн Засаг даргын Эдийн засаг, Дэд бүтцийн асуудал хариуцсан нэгдүгээр орлогч П.Сайнзориг оролцож, Нийслэлийн Засаг Даргын Тамгын газраас 2024 оныг “Тохижилт-Бүтээн байгуулалтын жил” болгон зарлаж, Улаанбаатар хотыг НЭГ ТӨВТ хотоос ОЛОН ТӨВТ хот болгон хөгжүүлэх хүрээнд үе шаттайгаар хэрэгжүүлж буй дэд бүтцийн ажлуудыг танилцуулан, иргэдийг орон сууцжуулах ажлыг эрчимжүүлэхэд санхүүжилтийг шийдвэрлэж, олон улсын байгууллагатай хамтран ажиллаж байгаа талаар дурдлаа.
Ногоон орон сууц төслийн хүрээнд 2023-2025 онуудад Шархад дэд төв, Баянзүрх дүүргийн 19-р хорооны талбарт нийт 338 айлын ногоон орон сууцны барилга угсралтын ажил хийгдэх бөгөөд 2024 оны 4-р улиралд эхний ээлжийн 110 айлын орон сууц ашиглалтад орохоор төлөвлөж байна. Тус уулзалтаар төслийн баг ногоон орон сууцны м2-ийн үнэ танилцуулахаас гадна эко хорооллын орчны болон дотор төлөвлөлт, барилга угсралтын үед бий болох ажлын байрыг танилцуулж, иргэдийг бүртгэж мөн бүтээн байгуулалтын ажлын хүрээнд байгаль орчны хамгааллын үйл ажиллагаа, мод нүүлгэн шилжүүлэх төлөвлөгөөний талаар дэлгэрэнгүй танилцуулж, 80 орчим өрхийн иргэдэд мэдээлэл хүргэлээ.
