Баянзүрх дүүргийн 19 дүгээр хороонд баригдаж буй 110 айлын ногоон орон сууц болон Сонгинохайрхан дүүргийн 9 дүгээр хороонд баригдаж буй 110 айлын ногоон орон сууцны барилга угсралтын ажилд хяналт тавих иргэдийн сайн дурын бүлгэмийн ээлжит уулзалтыг 2024 оны 10-р сарын 26-27-ний өдрүүдэд зохион байгуулж, иргэд өөрийн амьдарч буй газрын бүтээн байгуулалтад хяналт тавьж, үнэлгээ хийж ажиллалаа.

Уг хяналт, үнэлгээ хийх уулзалтад Баянзүрх дүүргийн 19 дүгээр хороо, Сонгинохайрхан дүүргийн 8 болон 9 дүгээр хорооны нийт 16-н иргэн мөн Нутгийн Буян групп ХХК, Таван Орд ХХК-ийн барилгын талбар хариуцсан инженер, ХАБ-ын инженерүүд тус тус оролцлоо. Хяналтын бүлгийн гишүүд барилгын ажил, ХАБЭА-н төлөвлөгөө, барилгын дотоод заслын ажлын явц, жендэрийн мэдрэмжтэй төлөвлөлтийн хэрэгжилт болон бусад барилгын ажил гүйцэтгэхэд шаардлагатай баримт бичгүүд, тэдгээрийн гүйцэтгэлтэй танилцаж ажилласан бөгөөд барилгын ажил хэвийн явагдаж байна гэсэн дүгнэлтийг гаргаж, бусад холбогдох саналыг барилгын ажил гүйцэтгэгчид болон төслийн нэгжид хүргүүллээ.