Нийслэлийн Иргэдийн төлөөлөгчдийн Хурлын ээлжит XXIII хуралдаанаар Улаанбаатар хотын ногоон орон сууц төслийн хүрээнд байгуулагдах “Эко хороолол ба орлогод нийцсэн орон сууцны сан”-д хөрөнгө оруулалт хийх тогтоолын төслийг дэмжиж баталлаа.
Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр “Төслийн 1-р бүрэлдэхүүний хүрээнд Баянхошуу болон Шар хад дэд төвүүдэд нам давхрын 800 өрхийн ногоон орон сууц бүхий эко хотхон, хорооллыг барина.
2-р бүрэлдэхүүнээр Эко хороолол ба орлогод нийцсэн орон сууцны санг байгуулж 4188 өрхийн ногоон орон сууц бүхий эко хорооллыг дэд төвүүдэд барина. Гуравдугаар бүрэлдэхүүний хүрээнд ногоон барилга эко хорооллын норм стандартыг тодорхойлох, салбарын чадавхийг бэхжүүлэх зорилтуудыг хэрэгжүүлнэ” гэдгийг хэллээ.
Уг төслийн хүрээнд баригдах орон сууцны барилгын зураг төсөл, барилгажилтын бүх үе шатанд ногоон барилгын 37 төрлийн гүйцэтгэлийн шалгуур үзүүлэлт (КР1) бүхий техникийн ерөнхий шаардлага болон Олон Улсын Ногоон барилгын үнэлгээний стандартыг хангуулах юм.
